TELUKKUANTAN (RIAUPOS.CO) – Kotu limo hari sabolun dan sasudah rayo, kampuang taraso rami. Ado suasana kampuang karono urang rantau banyak nan baliak. Sudah itu, rato-rato masyarakatpun kaluar uma di potang-potang hari.
Kini, kampuang olah longang. Urang kampuang nan balik potang, kini olah poi ka rantau masiang- masiang. Sedangkan urang asli kampuang, olah sibuk lo dek kegiatan inyo poi ka kobun.
Kalau mandongar carito, Beni Wahyudi kotu maota dengan Riau Pos, Senin (16/4) manyobuik, sajak urang rantau olah poi dari kampuang, ampia idak ado aktivitas nan mambuek masyarakat bakumpua basamo.
“Raso ado kamalangan kampuang. Biasonyo, di kodai lai rami sampai jam 1 malam. Kini jam 9 kodai idak baurang lai do. Nan mambuek parah, urang nan tinggal dikampuang ge, idak lo kaluar uma lai do. Keceknyo olah abi taponek dek karojo siang,” kato Beni.
Beni mancaritoan, rayo taun kini badokek dengan acara pacu jaluar nan diadokan dek Pemkab Kuansing. Sobab, awal bulan Mei 2024, akan ado pacu jaluar di Tepian Pantai Kecamatan Gunung Toar. Sahinggo masyarakat idak talalu maraso suntuak dek banyak agenda latian pacu jaluar.
“Mungkin dek disambuik musim pacu jaluar, makonyo longang nan kini idak akan taraso lamo. Kalau olah tibo musim pacu jaluar, urang Kuansing biasonyo ilang akal dek manonton. Dek urang Kuansing, lobie pontiang mancarian piti untuak nonton pacu jaluar daripado untuk persiapan hari rayo,” kecek Beni.
Beni manyobuik, biaya manonton pacu jaluar lobiah godang daripado manghadapi rayo. Kalau pacu jaluar, sagalonyo mambayar. Mulai dari minyak kendaraan, uang parkir, uang masuka tribun penonton.
“Itu olun bamasuak an biaya balanjo makanan dan buah-buahan pas baliak beko tu. Pokoknyo, kalau poi sa kaluarga, menimal bao piti Rp400 ribu sakali poi. Nan mambuek banyak piti abi de, dek poi dari pagi, sudah itu baliak malam,” carito Beni.(yas)
